Ginabanta nga kapin P7 million ang damage nga gintuga sang sunog nga naglamon sa kapin 18 stalls sa isa ka marketplace sa Barangay Cabacungan, banwa sang La Castellana, kahapon sang kaagahon.
Sa interview sang Bombo Radyo Bacolod kay Senior Fire Officer 3 Eulogio Patriarca, Municipal Fire Marshal sang La Castellana Fire Station, ginabanta pa lang nga P7 million ang damage sang sunog samtang wala pa man natumod ang ginhalinan sang kalayo nga nagtuga sang pagkatupok sang mga stalls bangud nagapadayon pa ang ila nga imbestigasyon.
Wala pa man matumod kun pila gid ka mga stalls bangud wala pa makita sang fire marshal ang actual nga lista nagikan sa business office.
Suno kay Patriarca, 24 hrs man ang pagmonitor nila kun may fire call apang nangin pagpanghangkat man sa mga bombero ang kalayuon sini nagikan sa banwa kag ang dalan pasulod sa nasambit nga barangay gani nadugayan ang ila nga pagresponde sa nasunugan.
Nagpanugyan man ini sa mga pumuluyo nga himuon ang mga fire safety agud mangin hilway sa sunog bangud kun ini ang magluntad, ang kalayo ang indi mahawiran sa pagtupok sang atun balay ukon propedad.
Samtang, gintulok nalang nga may kasubo kag paglangot sang buot sang isa ka stall owner samtang ginatupok sang kalayo ang ila stalls sa nagluntad nga sunog sa isa ka marketplace sa Barangay Cabacungan, banwa sang La Castellana, kahapon sang kaagahon.
Suno kay Allan Demafelis, isa ka tag-iya sang stall, sa pagbugtaw sini, iya nabatian ang tingog nga nagapahibalo nga ang ila nga stall ang ginalamon na sang kalayo.
Suno kay Demafelis, madasig man ini nga naggwa kag nasaksihan mismo ang paglamon sang kalayo sa ila duha ka bloke.
Suno diri, indi naman sini mapalong ang kalayo bangud dako na ini.
Indi man ini magpati nga ang una nga bloke ang ginsulod pa sang kalayo nga may fire wall na ini apang bangud sa mabaskog nga hangin, ginhuyop ang kalayo padalom kun sa diin nagdukot ang kalayo sa iban nga stalls.
Ginpahayag man sini kun nakaabot gilayon ang bombero natabangan pa ang iban nga stalls.
Ang mga nasunog nga stalls ang ginalakipan sang ginabaligyaan sang bugas, assorted nga mga baligya, kalan-an kag kapehan.
Wala naman sang may nahimo ang nasunugan kundi lantawon ang nagakasunog nga stalls sang masubo.
