Nagdangat sa P300,000 nga balor sang illegal nga palupok ang nakumpiskar sang regional civil security unit sang Negros Island Region sa probinsya sang Negros Occidental.
Sa interview sang Bombo Radyo kay Police Capt Freddie Cayot Jr, pinuno sang firearms and explosives section RCSU-NIR, nagalibot-libot sila sa rehiyon agud magpatigayon sang inspection sa mga nagabaligya sang palupok.
Suno diri, nakalibot na sila sa banwa sang Cauayan, Ilog kag ciudad sang Kabakalan, San Carlos kag Cadiz apang padayon pa ang pag-inspect man nila sa iban pa nga banwa kag ciudad sang probinsya.
Nalakip sa ila mga ginkumpiskar amo ang mga produkto nga wala sang label, dalagko nga palupok, ang ginadumilian nga ibaligya kag ang mga imported.
Ini tanan tiponon kag dululungan nga idispose sa Enero 6 ukon 7 sa Police Regional Office.
