Nagnubo na ang numero sang mga baboy sa Negros Occidental nga nagakapatay kada adlaw bangud sa hog cholera kun ikumparar sang bulan sang Abril kag Mayo.
Santo sa monitoring sang Provincial Veterinary Office, sang tinalikdan nga bulan, indi magnubo sa 400 tubtub 500 ang numero sang mga baboy nga nagakapatay kada adlaw, apang sa karon, 150 tubtub 200 nalang ang daily hog mortality.
As of June 27, 14, 738 ang kabug-usan nga baboy nga nagkalamatay sa 141 ka barangay sa 18 ka mga banwa kag ciudad sa Negros Occidental kun sa diin 2, 967 ka hog raisers ang apektado.
Ang 14,738 ka baboy ang nagabalor sang P166 million.
Suno kay Governor Eugenio Jose ‘Bong Lacson, may dugang nga duha ka barangay nga nakareport sang hog mortality kahapon.
Ang numero sang baboy nga napatay ang katumbas sang 9 percent sang total hog population sa apektado nga mga lugar.
Suno kay Lacson, magahatag ang provincial government sang financial assistance sa apektado nga hog raisers apang indi paghatagan ang wala nagsunod sang husto nga proseso sa disposal sang napatay nga baboy kaangay sang naghaboy sa sini sa suba sa baylo nga ilubong bangud mas ginpalala sini ang sitwasyon.
Suno sa gobernador, ang ayuda ang direkta nga igahatag sa hog raiser, apang sa karon, gina-identify pa kun sin-o ang nagakadapat nga makabaton.
