Ginpahayag sang Philippine Statistics Authority (PSA) nga 19-anyos na si Bamban, Tarlac Mayor Alice Guo sang narehistro ang iya birth certificate.
Makapila ka beses na nga ginpahayag ni Guo nga wala ini nakahibalo kun ngaa madugay pa antes ini nakaparehistro apang pila ka mga senador ang ginalantaw ini nga makatilingala.
Apang suno kay PSA Assistant National Statistician Engr. Marizza Grande, nagakatabo gid man ang late birth registrations.
Humalin 2013 tubtob 2022, ang annual average nga numero sang delayed birth registrations ang yara sa 972,830.
Sa 111 million Filipinos sang 2020, 3.7 million ang wala sang birth certificates ukon wala narehistro.
Suno kay Grande, kalabanan sa mga pumuluyo ang indi makaparehistro sa oras kag isa diri sa ginalantaw nga rason amu ang negligent sang ginikanan agud ireport ini sa mga local civil registrars.
Lakip na diri ang mga yara sa hulungdon nga mga lugar kag wala sila sang paagi agud magpadulong sa banwa agud magparehistro.
Ang dapat naman nga kahangaw-an amu ang paglapta sang peke nga mga birth certificates.
Sa karun gina-imbestigahan sang PSA ang kapin 300 ka mga local cases kag 65 ka mga kaso nga ginalakipan sang mga foreigners.
