Ginpanginwala ni Bamban, Tarlac Mayor Alice Guo ang alegasyon ni Senator Sherwin Gatchalian nga siya si Chinese national Hua Ping Guo.
Sa isa ka statement, ginpahayag sang kampo ni Guo nga wala ini nakahibalo sang bissan ano nga dokumento nga ginatumod ni Gatchalian.
Santo sa statement, nagapanindugan si Mayor Guo nga ang iya matuod-tuod nga iloy amu si Amelia Leal kag ang iya matuod-tuod nga pangalan amu si Alice Leal Guo nga nasanto sa iya birth certificate kag indi Guo Hua Ping.
Suno kay Atty. Stephen David, ang abogado ni Guo, sarang nila nga mapamatud-an nga indi matuod ang mga akusasyon batok sa iya.
Suno diri, kun matuod nga siya ang may yara sang Chinese passport, indi na sini kinahanglan pa nga magkuha sang Chinese visa bangud ang iya Chinese passport ang valid sa China kag kun anuman ang ginapagwa sang mga Senador, ila ini pagaatubangon sa husgado.
Suno kay David, ila ginatun-an sa karun kun sila ang magapasaka sang isa ka kaso batok sa mga nagpublicize sang mga dokumento may kaangtanan sa alkalde kaangay sang iya Statement of Assets Liabilities and net worth ukon SALN, nga suno diri, nagalapas sa Data Prvacy Law.
Sang Martes, nagpagwa si Gatchalian sang kopya sang Chinese passport ni Guo Hua Ping kag sang iya Special Investors Resident Visa (SIRV), nga nagapakita nga ini ang nagsulod sa Pilipinas sang Enero 12, 2003 sa edad nga 13-anyos kag ginbun-ag sang Agosto 13, 1990 sa iloy sini nga si Wen Yi Lin.
