Patay ang bana samtang pilason naman ang asawa nga negosyante matapos ginluthang samtang nagabaligya sang buhi nga baboy sa livestock market sa Purok Caimito, Barangay Bunga, Salvador Benedicto, Negros Occidental alas-4:40 kaina sang kaagahon.
Ang napatay ang ginkilala nga si Alyas Reynaldo, 57 anyos samtang nasamaran naman ang iya asawa nga si Alyas Carlita, 48 anyos, residente sa Sitio Kabiguhan, Barangay Prosperidad, San Carlos City.
Sa interview sang Bombo Radyo Bacolod kay Police Captain Ignacio Javier, deputy chief of Police sang Don Salvador Benedicto Municipal Police Station, tiyenda sa Brgy Bunga, gani yara ang mag-asawa sa stockyard agud ibaligya ang ila ng mga baktin agud ihawon.
Apang, hinali na lamang nag-abot ang wala makilal-an nga suspect kag ginluthang ang mag-asawa.
Naigo sa ulo ang lalaki nga gintunaan sang gilayon sini nga kamatayon.
Naigu-an man sa natuo nga bahin sang ulo ang asawa, apang ini ang indi gid man patal, gani sa karun siya ag ginabulong na sa Don Salvador Benedicto Municipal Health Unit.
Suno kay Javier, narecover nila sa crime scene ang duha ka basiyo sang cal. 45.
Ang suspect ang gilayon naman nga nagpalagyo sa medyo nabukid nga dereksyon padulong na sa banwa sang Calatrava kag ciudad sang San Carlos.
Padayun man ang ila pag-usisa sa pamilya sa mahimo may motibo sa krimen, samtang ginahulat man nila nga makasugilanon ang asawa.
