Patay ang bana nga isa ka e-bike driver samtang pilason naman ang iya asawa matapos gintiro sang duha ka wala nakilal-an nga kawatan sa Concepcion Public Market, Zone 4, Barangay Concepcion, Talisay City, Negros Occidental, ala-1:30 kaina sang kaagahon.
Ang mga biktima amo ang mag-asawa nga sanday Ildefonso Medalla kag Denalyn Medalla, residente sang Hda. Gloria, Brgy. Concepcion, Talisay City.
Sa interview sang Bombo Radyo kay Bernie Separa, nakabati ini sang apat ka sunod-sunod nga lupok kag matapos ang pila ka segundo nasundan sang isa pa gid ka lupok.
Suno diri, nagatrabaho si Denalyn bilang isa ka manugluto sa karinderya kag sakay sang ila motor nagdulhog ang mga-asawa sa ila bloke sa merkado kag didto nila nakita ang duha ka lalaki nga nagapangawat sa katupad nila nga bloke.
Bitbit sang mga suspetsado ang isa ka sako sang bugas nga ila ginsudlan sang ila kinawatan.
Pahayag ni Separa, nag-agaway si Ildefonso kag ang suspek sang bag kun sa diin indi ini kuntani luyag nga pag-ihatag sang biktima kag didto na ini gintiro sang apat ka beses sa dughan nga gintunaan sang iya kamatayon samtang pilason naman si Denalyn nga nag-agom sang igo sa tyan nga gindala sa Corazon Locsin Montelibano Memorial Regional Hospital agud mahatagan sang nagakaigo nga pagbulong.
Nakuha sang mga suspetsado ang bag sang mag-asawa nga may unod nga cellphone kag P3,000 nga kwarta.
Samtang, sa interview sang Bombo Radyo kay Edgar Pandacan, manghod sang biktima nga si Denalyn Medalla, may tabon ang nawong sang duha ka suspetsado nga may mataas nga height kag mabukod nga panglawason.
Nagatrabaho bilang tanod si Pandacan kag suno diri, wala man sang may nanotosyaran nga nagalibot sa area kag ini ang una nga kahigayunan nga natabo ang ini nga isidente sa ila area.
Suno diri, masami nga mga kabataan ang nagakadakpan bangod sa pagpangawat.
Ang mag-asawa nga sanday Ildefonso Medalla kag Denalyn Medalla may yara sang lima ka kabataan.
Nagapanugyan si Pandacan nga madakpan ang duha ka suspetsado kag ila bayaran ang sala nga ila ginhimo.
