Patay ang isa ka lalaki matapos ginlabo sang kirido sang iya asawa sa Sitio Batilo, Brgy. Po-ok, Hinoba-an, Negros Occidental sang Hunyo 30, 2026.
Ginkilala ang asawa nga si Jimma Lebria samtang ang biktima si Edwin Lebria kag ang suspek amo si Gerardo Ejara.
Si Edwin kag Gerardo ang magbilas bangod mag-utod ang ila nga asawa.
Sa interview sang Bombo Radyo Bacolod kay Police Major Eric Doronilla, Chief of Police sang Hinoba-an Municipal Police Station, ang biktima nga si alyas Ed ang nasapwan sa sulod sang balay nga wala sang kabuhi kag duguon.
Suno kay Doronilla, sa panaysayon sang mga nainterview nila nga witness, may yara sang komosyon nga nagluntad sa tunga sang mag-asawa nga nasaksihan mismo sang ila menor de edad nga mga kabataan sang Lunes sang gab-i.
Suno sa hepe samtang nagainaway ang mag-asawa nagaestoryahanay ang asawa kag ang iya kirido sa telepono.
Naglakat ang asawa kag makaligad ang pila ka minutos nagsulod ang suspek sa balay sang biktima kag wala sang madamo nga estorya ginlabo ang niya ini nga nakaangkon sang pilas sa liog.
Sa impormasyon nga nakuha sang mga kapulisan si Jimma kag Gerardo ang may relasyon kag may yara naman sang kabataan.
Madamo naman nakahibalo sang sitwasyon sang asawa sang biktima kag sang suspek.
Sa karun, nadakpan na si Gerardo paagi man sa hot pursuit operation kag tip sang nakawitness sa krimen.
Nagsungka naman si Jimma bangud wala naman ini sang mahimo.
Kahapon, gin-inquest na ang kaso nga murder batok kay Gerardo sa Office of the Provincial Prosecutor samtang nakadepende sa piskal kun pasakaan sang kaso nga accomplice ukon accessory to crime si Jimma.
