Nagpakilala nga mga katapo sang New People’s Army (NPA) ang lima ka armado nga lalaki nga nagluthang patay sa bana sang isa ka Barangay Kagawad sa Sitio Banquerohan, Barangay Salamanca, Toboso, Negros Occidental.
Ang biktima ang ginkilala nga si Allan Macasling Sr., 55 anyos, nagapanag-iya sang punong kag residente sa nasambitan nga lugar.
Sa interview sang Bombo Radyo Bacolod kay Police Major Jun Ray Batadlan, hepe sa Toboso Municipal Police Station, gikan sa Punong ang biktima sang ini ang ginpalapitan sang lima ka armado nga mga lalaki, ginposasan kag gindala pa sa puluy-an sini.
Antes ang pagpangluthang, nagsugilanon pa ang mga suspetsado kag ang asawa sang biktima nga Barangay Kagawad.
Ginapanindugan sang nagapakilala nga NPA members nga abusado ang biktima gani ila patyon.
Kasunod sang pagpatay, nagpalupok pa sang makapila ka beses ang mga suspetsado antes nagbiya sa lugar.
Padayun sa karun ang pagpatigayon sang pursuit operation sang Toboso Municipal Police Station sa mga suspetsado.
