Nasapwan sang mga otoridad ang ginapatihan nga bangkay ni Mutya ng Pilipinas Pampanga candidate Geneva Lopez kag ang iya nga Israeli fiance nga si Yitshak Cohen nga duha na ka semana nga nadula.
Ini matapos nga madiskubre sang Scene of the Crime Operatives (SOCO) sa ila nga pagkutkot ang halos nagakaagna na nga bangkay sang isa ka lalaki kag babayi sa remote quarry site sa Barangay Sta. Lucia sa Capas sa probinsya sang Tarlac, kahapon sang aga.
Ini ang nadiskubrehan matapos makabaton sang impormasyon nagikan sa isa ka witness sang kaso.
Sa karun, ginahulat sang pamilya nga matumod ang identity sang nakutkutan nga mga bangkay.
Magapatigayon man ang mga otoridad sang nagakaigo nga imbestigasyon kalakip na ang autopsy agud nga matumod ang kabangdanana sang kamatayon sang mga biktima kag DNA testing kag analysis agud nga maverify ang identity sang mga ini.
Madumduman nga ulihi nga nakita ang magkahugma sadtong Hunyo 21 sakay sa SUV padulong sa Tarlac agud kuntani makita ang lupa nga ila kuntani luyag nga baklon sa nasambit nga probinsya.
Sa ulihi, nasapwan ang ila nga salakyan nga nasunog kag gin-abandona sa Barangay Cristo Rey sa Capas sang Hunyo 22 sang aga.
Natumod naman sang Philippine National Police ang 7 persons of interest sa kaso kalakip ang nagserbe nga middleman ukon ahente para sa pagabaklon kuntani nga property sang duha nga nabulgar sa ulihi nga anay isa ka police.
