Gin-athag sang Manapla Municipal Police Station nga indi pa nila kumpirmado ang identity sang nasapwan nga bangkay sa higad dalan sa Bangga Ibus, Barangay Tortosa, banwa sang Manapla, Negros Occidental sang Sabado sang gab-i bangod wala pa sang may nagclaim nga pamilya.
Madumduman nga una na nga nagpalapit sa Manapla Municipal Police Station si Allen Aniban nga nagpakilala nga live in partner sang biktima samtang ginkumpirmar naman sini nga si Reynald Quiatchon, 30-anyos nga residente sa Barangay Taculing, Bacolod City, ang bangkay.
Apang sa interview sang Bombo Radyo Bacolod kay Police Major Jaynick Bermudez, hepe sang Manapla Municipal Police Station, matapos magpauli si Aniban, wala na sini ginbalikan pa ang biktima tubtob sa karun.
Sa pihak nga bahin, gintumod naman sang Bacolod Police Station 6 ang background ni Quiatchon, kag natumod nga pila na ini ka bulan nga wala nakabalik sa barangay kag nademolish naman ang ila nga balay.
Si Quiatchon man kag ang utod sini nga naaresto sa buybust operation sa ila nga puluy-an sadto ang ginatudlo nga kawatan sang manok kag kable sang kuryente sa Barangay Taculing.
Ang bangkay ang nasapwan nga nakabaklid, may higot ang kamot kag tiil, nakabusal ang bibig kag may igo sang bala sa ulo, samtang yara naman sa tupad sini ang karton nga may nakasulat “Wag tularan, Kawatan ako!!”
Suno kay Bermudez kahapon lang napaidalum sa post mortem examination ang bangkay kag mahimo magagwa ang resulta subong nga adlaw.
