Nakilala na ang bangkay sang lalaki nga nasulod sa sako kag nasapwan sang nagapangscrap sa Purok Malipayon, Barangay 35, Bacolod City kahapon sang aga.
Sa interview sang Bombo Radyo Bacolod kay Police Major Jovil Sedel, station commander sang Bacolod Police Station 1, ginkilala ang bangkay nga si Joel Aviles Jr., 30 anyos, residente sang Purok 3 Lampirong, Sitio Magsungay, Barangay Singcang-Airport, Bacolod City kag isa ka masahista.
Suno kay Sedel, nagpadulong ang pakaisa sang biktima sa Bacolod City Police Station 1, agud tsekyaron ang nasapwan nga bangkay sa Barangay 35 bangud may isa sila ka himata nga wala makapauli.
Ginpakita sini ang laragway kag ginpahayag sang pakaisa sang biktima nga daw kaangay sang ginapangita nila ang dagway sang nasapwan nga bangkay gani gin-updan ini sang pulis sa punerarya.
Diri nakumpirmar nga si Aviles ang bangkay.
Suno kay Sedel, ginalantaw ang tanan nga mga anggulo sa pagpatay sa biktima.
Suno diri, bag-o pa lang man nila nabatian ang ngalan sang biktima kag tsekyaron pa sini sa Station 8 ang background.
May ara na sila sang resulta sang inisyal nga imbestigasyon apang indi pa mabuyagyag.
