Wala pa gihapon makilal-an ang bangkay nga nasapwan nga naga-utaw utaw sa Carmen Shoal nga sakop sang Brgy Tiglawigan, Cadiz City.
Sa interview sang Bombo Radyo Bacolod kay Police Lt Mansueto de Jose, Deputy Chief of Police for Operation sang Cadiz City Police Station, ang bangkay ang nakita sang mangingisda, nga gilayon nga nagreport sa Barangay.
Isa ka Barangay Kagawad naman ang nagpadulong sa ila estasyon agud magpahibalo.
Sa pagbanta ni De Jose, kapin apat ka adlaw na nga naga-utaw utaw sa dagat ang bangkay, bangod ini ang yara na sa advance stage of decomposition kag may mga bahin na nga ginkaon sang isda.
Apang makilal-an paman ang nawong sini, nga sa pagbanta sini middle aged na.
Sa medical examination, nakita nga ang bangkay ang napatay bangod sa asphyxia due to drowning ukon pagkalumos, kag wala man sang nakita nga foul play ukon signs of struggle.
Ini ang may suksok nga itom nga tshirt kag itom nga shorts sang nasapwan.
Panawagan ni De Jose sa mga may wala pa nakapauli nga himata nga kaangay ang discreption, nga magpalapit sa ila agud maassist sa pag-identify sang biktima.
