Nakilala na ang bangkay nga nasapwan kahapon Marso 9 nga nabaklid kag may tabon nga brown nga tela sa ulo sa Purok Cobra, Barangay Igmayaan, Salvador Benedicto, Negros Occidental.
Sa interview sang Bombo Radyo Bacolod kay Police Lieutenant Ignacio Javier, Deputy Chief of Police sang Don Salvador Benedicto Municipal Police Station, ginkilala ang biktima nga si Allen Palmos, 29 anyos, soltero kag residente sang Fortune Town, Brgy. Estefania, Bacolod City.
Suno kay Javier positibo ini nga ginkilala sang iya magulang nga babaye matapos nga nakita sa social media ang litrato nga may tattoo nga CMDR JOK2X BALDOMAR ang likod nga kaangay man sang iya manghod.
Suno sa pahayag sang magulang nga tatlo na ka adlaw nga wala ini makapauli bangud Marso 7 pa ini nagbiya sa ila balay.
Naanad naman sila nga nagabalik man ini sa tagsa nga maglakat.
Suno pa sa iya, ginatawag man ini nga alyas kumpol bangud may yara ini deperensya sa tiil.
Sa karon padayon pa ang pag inbestigar sa sini nga kaso agud matumod ang motibo kag kon sin o ang suspitsado nga nagpatay sa biktima.
Suno kay Javier nag ayo ang pamilya sang biktima nga hatagan sila sang privacy sa sini nga kaso.
