Ginkilala na sang pamilya ang bangkay nga nasapwan sang Martes sang gab-i, Mayo 2 sa economic highway sa Barangay Cabug, Bacolod City.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 9, nagpadulong ang tropa nagikan sa nasambit nga police station sa syudad sang Silay agud ipakita ang litrato sang bangkay kun sa diin positibo naman nga ginkilala sang pamilya ang bangkay sang ila nga himata nga nadula sang tinalikdan nga Abril 18.
Suno kay Tapang wala naman ginpaidalom sang pamilya ang bangkay sa autopsy examination bangud kumbinsido naman ang mga ini nga ang bangkay ang ila himata nga nadula.
Suno sa station commander, nakilala sang iloy sang biktima kag sang live-in partner sini ang bangkay bangud sa facial features, structure, kag height.
Ginpahayag man sini nga isa man sa factors ang lukso ng dugo gani madasig nga nakilala sang pamilya ang bangkay sang nadula nila nga himata.
Suno kay Tapang, nag-ayo ang pamilya nga indi nalang pag-iwaragwag sa publiko ang pangalan sang ila nga himata.
Wala na ginpadalman sang police station 9 ang background sang biktima apang suno sa pamilya nadakpan ini sa ginpatigayon nga buybust operation sang Silay City Police Station sang 2015.
Matapos matumod ang identity sang bangkay ginpalubong na ini sang pamilya kag ginatugyan na sa Silay City Police Station ang imbestigasyon sa natabo sa biktima.
