Wala pagid sang pamilya nga nakatumod sang identity sang bangkay nga nasapwan sa kampo sang tubo sa Hacienda Bernabe, Brgy Salvacion, Murcia sang Disyembre 19.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, subong palang nga adlaw ginpatigayon ang autopsy sa bangkay bangod sang nakaligad wala sang available nga makapatigayon sang autopsy examination.
Nagapabilin naman sa punerarya ang bangkay, kag hinali nga makita nga makatuga na sang health hazzard, ini ang ila na lamang nga ipalubong.
Ginkuhaan naman nila sang DNA sample ang biktima, agud magamit kun may pamilya nga luyag magpatigayon sang DNA testing.
Apang sa karun, wala pagid sang nagdangop nga pamilya agud kilalahon ang bangkay.
Padayun ang panawagan ni Labaro sa mga may missing nga himata nga sarang ang mga ini nga makadangop sa Murcia Municipal Police Station, agud makabulig sa pagtumod sang identity sang biktima.
Madumduman nga nasapwan sang tapasero sang tubo ang bangkay nga hublas, nagakulob kag nalubong sa duta, kun sa diin may bahin lamang sang lawas nga naggwa sa duta kag amo ang nagpanimaho.
Ang biktima ang may kataason nga 71 inches ukon 5-foot-11.
Suno kay Labaro, wala pagid sila sang nakuha nga ebidensya ilabi na nga madulom ang area kag wala sang pamalay.
Ang hepe ang una naman nga nakarequest sa Municipal Government nga mabutangan sang suga ang area nga nagaserbe nga exit route sang banwa.
