Wala na sang duha ka dulunggan ang bangkay nga nasapwan nga naga-utaw utaw BREDCO Port.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, sa report sang Scene of the Crime Operation, kaangay nga ginlihap ang duha sini ka dulunggan gamit ang matalom nga bagay.
Humalin sang nasapwan ang bangkay, may tatlo na ka pamilya nga nagtsekyar kun ila himata ang biktima apang lunsay negatibo.
Sa karun padayun man sa pagpangita sang lead ang ila nga imbestigador.
Suno diri, kun mabulanan kag wala sang may magclaim sa bangkay, sila na mismo ang magapa-autopsy diri agud may mabilin nga record antes irefer sa Bacolod City Government agud mahatagan sang disente nga lubong.
Apang sa karun, sila ang padayun pa nga nagapanawagan sa may namissing nga himata nga makig-angot lamang sa ila agud matsekyar ang biktima.
Paathag sini nga wala pa nila ginpaidalom sa autopsy ang bangkay bangod mahimo mangakig ang pamilya kun ini ang gintandog nga wala nakapangayo sang otorisasyon.
Suno diri dako ang bulig kun matumod ang identity sang bangkay agud nga ma-imbestigaran ang background sini, kun may naka-away ukon may-ara sang nagadumot sa iya.
Samtang ginalantaw man ni Tolentino nga mahimo wala na sang ginapulian ang biktima rasun kun ngaa hungod nga ginbutang sang suspect ang bangkay sa lugar nga ini ang makit-an.
