Nakilala na ang nasapwan nga bangkay sa BREDCO Port Seawall, Purok Cambodia, sa likod sang Moreta Cargo, Barangay 2, Bacolod City, sang Nobyembre 17.
Ginkilala ini nga si Alvelino Albe, 47-anyos kag residente sang Barangay E lopez, Silay City.
Sa interview sang Bombo Radyo kay Police Major Eugene Tolentino, station commander sang Bacolod Police Station 2, pasado ala-1:00 kahapon sang hapon, Nobyembre 18 nagkadto ang utod sang biktima nga si Ronel sa ABE Funeral Homes matapos nakabaton sang impormasyon nga may ginapanawagan nga nasapwan nga bangkay.
Nakumpirmar ni Ronel nga utod niya ang biktima.
Suno diri, ang iya utod ang nagapuli lang agud nga magkaon kag gulpi lang nagahalin sa ila nga balay.
Ini ang masami man nga nagalagaw sa ciudad sang Bacolod.
Suno sa mga residente, masami nila nga makita nga nagatambay sa BREDCO Port Seawall ang biktima.
Sa karun, ginahulat pa ang resulta sang medico legal agud matumod kun may yara sang foulplay sa kamatayon ni Albe.
