Ginkumpirmar sang Punong Barangay sa Brgy Tangub, Bacolod City nga yara sa Barangay Anti-Durg Abuse Council (BADAC) list ang lalaki nga nasapwan patay sa Bangga Adam, Barangay Pahanocoy, Bacolod City sang Huwebes sang aga.
Ang biktima ang ginkilala nga si Wilson Borda alyas Tonton, 32 anyos, residente sang Prk Rojas, Brgy Tangub, Bacolod City.
Sa interview sang Bombo Radyo Bacolod kay Punong Barangay Noli Villarosa, kilala sini ang biktima bangod ini ang nalakip sa listahan sang mga suspected nga nagagamit ukon nagabaligya sang illegal nga droga.
Suno diri, makaduha na sini nga ginrekomendar kay Tonton ang pagpaidalom sa Community Based Drug Rehabilitation Program, apang wala nagapakita ang biktima.
Suno kay Villarosa, nag-ako mismo si Tonton nga ini ang nagagamit sang illegal nga droga, apang ginpanginwala ang pagbaligya.
Wala naman sini namonitor ang mga aktibidad sang biktima, bangod ini ang wala man nagapanggamo, wala nagamaoy, kag pasekreto lamang ang paggamit sang illegal drugs.
Suno diri, naanad na siya nga ang mga yara sa BADAC list nga ginapadala sa Bacolod City Police Office, Bacolod Police Station 8, Philippine Drug Enforcement Agency kag Department of the Interior and Local Government, ang masami man nga nagakadakpan sa drug buybust operation.
Gani nakibot ini sang makita sa social media ang post nga ginpatay si Tonton.
Suno diri, kaangay nga tuman ang kaakig sang naghimo sang krimen.
Si Tonton ang may dako nga laslas sa liog, may mga pilas sa butkon, guya kag dughan, kag kaangay nga ginpanitan ang batiis tubtob sa hita.
Nagapati man ang Punong Barangay nga may mga barkada si Tonton nga nagagamit man sang illegal nga droga.
Pasalig naman sini ang bulig sang Barangay sa nalisdan nga pamilya.
Samtang padayun man ang imbestigasyon sang kapulisan sa krimen.
