Ginalantaw nga nakuryente ang bangkay nga nasapwan sa Purok Crossing 8, Barangay Tangub sa ciudad sang Bacolod, kahapon sang hapon.
Ginkilala ang biktima ka Jerecho Perolino, legal ang edad kag residente sa amo nga lugar.
Ginpahayag ni Police Captain Greeky Cayao, Station Commander sang Bacolod Police Station 8, nakita ang pilas sa tuo nga kamot ni Perolino nga kaangay sang napaso.
Suno kay Cayao, may nakakita sa biktima nga magakuha kuntani sang kuryente sa isa ka balay sa lugar.
Suno diri, possible nga matapos makuryente ang biktima nagkadto ini sa lugar, kag didto ginbawian sang kabuhi.
Narekober sa bulsa sang biktima ang totter, sachet sang ginapatihan shabu, kag plier.
Sa karun padayon pa ang imbestigasyon sang mga kapulisan agud nga matumod ang rason sang kamatayon sang biktima.
Samtang, pila naman ka oras nga pangitaay sang pamilya sa biktima antes ini nasapwan nga wala na sang kabuhi.
Suno kay Mary Grace Pranisa, nagpamangkot pa ang asawa sang biktima kun ini ang ila nakita bangud halos bilog nga adlaw ini nga wala makit-an.
Suno kay Pranisa wala man sang kontra ang biktima sa ila lugar kag wala man ini nagakadto sa lugar kun sa diin siya nasapwa, gani katingalahan kun ngaa nakalab-ot ini didto.
