Makaligad ang malapit isa ka semana, nakilala na ang bangkay sang lalaki nga nasapwan sa higad sang katubuhan sa Murcia, Negros Occidental kag may tattoo nga Melvin Odicta sa dughan sini.
Sa interview sang Bombo Radyo kay Police Major Robert Dejucos, hepe sang Murcia Municipal Police Station, mismo ang iloy sini ang nagkadto sa banwa agud kilalahon ang iya bata nga nasapwan sa Hacienda Ko, Purok Valencia, Barangay Pandanon Silos sang nakaligad nga Sabado.
Suno diri, ang biktima ang ginkilala kay Cris Jan Depotado, 24 anyos kag residente sang Purok 1, Brgy. Gogo, Estancia, Iloilo samtang nagapuyo na sa karun sa San Carlos City, Negros Occidental kaupod ang iya live-in partner.
Suno sa iloy sang biktima nga si Merly, Disyembre 13 pa sang ulihi nga nakita ini sang iya live-in partner.
Gintu-ad man sang iloy sini nga nakuha niya ang tattoo sang ini ang napriso sang naga-edad pa lamang sang 19 bangud sa kaso nga pagpangawat sa Estancia, Iloilo.
Apang indi man kilala sang iloy sini kun sin-o si Melvin Odicta nga gina-tudlo nga drug lord sa Iloilo kag ginpatay sadtong Agosto 2016 sa Caticlan Jetty Port sa Aklan.
Sa karun, blangko pa sa gihapon ang Murcia Police Station kun sin-o ang nagpatay kay Depotado nga nasapwan kag naputos sang packing tape ang ulo, kamot kag mga tiil sini.
Samtang, may yara sang iban pa nga anggulo nga ginatutukan ang mga kapulisan sa Murcia, Negros Occidental may kaangtanan sa pagpatay sa lalaki nga nasapwan sa higad sang katubuhan kag may tattoo nga Melvin Odicta sa dughan.
Sa interview sang Bombo Radyo Bacolod kay Police Major Robert Dejucos, hepe sang Murcia Police Station, gintuad sini nga may yara na sang impormasyon ang pamilya sang biktima nga may kaangtanan sa iya kamatayon apang wala naman ini ginpakigbahin bangud isa ini ka isyu nga pinamilya kag indi nagakadapat nga ipahibalo sa publiko.
Wala naman sang nasugid nga may kontra ini ukon sa mga aktibidad sini sa iya live-in partner gani wala man sang makuha nga impormasyon ang mga kapulisan agud makabulig sa imbestigasyon sa natabo sa biktima.
Samtang, dako naman ang pagpati ni Dejucos nga may kaangtanan sa iligal nga druga ang kaso sini base sa initial result sang imbestigayon nga ginpatigayon sang Murcia Municipal Station.
Aminado man ini nga nabudlayan sila sa pag–imbestigar bangud wala sang makatestigo sa natabo.
