Nagalaom ang Sagay City Police Station nga may pamilya nga magaclaim sang bangkay sang isa ka lalaki nga nasapwan kahapon sang aga sa Hacienda Conchita Tres, Brgy. Paraiso, Sagay City, Negros Occidental.
Sa interview sang Bombo Radyo Bacolod kay Police Master Sergeant Rolin Jaluag, imbestigador sang Sagay City Police Station, wala pa naidentify ang biktima kag ginalauman nila nga may pamilya nga magpadulong sa estasyon.
Ini ang nasapwan sa dalan nga natung-an sang katubuhan kag maligwin ang lugar.
Santo sa inisyal nga imbestigasyon sang police, ang biktima ang may pilas sa ulo.
Nagpamangkot man sila sa mga pumuluyo kun may yara sila sang nabatian nga lupok apang negatibo.
Ginalantaw man nila nga sarang nga ginbilin lamang ang biktima sa lugar.
Nagtawag man ang Sagay City Police sa Escalante kag Cadiz City Police Station agud nga mahibaluan kun may yara sang namissing sa mga lugar apang negatibo.
Bangud sa malain nga panahon, himuson na lamang nila ang bangkay kag ginrefer sa Scene of the Crime Operatives (SOCCO) bangud altered na ang krimen kag madamo naman ang nagpadulong sa lugar agud mangusisa.
Ginahulat na lamang nila ang resulta sang post mortem examination agud matumod kun ano ang ginhalinan sang pilas sa ulo sang biktima.
