Blanko sagihapon ang Bacolod Police Station 2 sa identity sang bangkay sang lalaki nga nasapwan nga natabunan sang sako sa sea wall sa BredCo Port sa Brgy. 2 ciudad sang Bacolod, nga nasapwan sang Nobyembre 12 sang gab-i.
Sa interview sang Bombo Radyo Bacolod kay Police Major Eugene Tolentino, commander sang Bacolod Police Station 2, ginpahayag sini nga blangko pa ang kapulisan sa identity sang biktima apisar nga pila na ka mga residente ang nagpadulong agud i-verify ang bangkay apang tubtob sa karun wala pa ini makumpirmar.
Suno sa station commander wala naman sang nareport nga missing person sa sakop sang Bacolod Police Station 2.
Ang bangkay sang nasapwan ang indi pa bloated.
Nagapabilin sagihapon sa punerarya ang bangkay sang biktima.
Madumduman nga nasapwan ang bangkay sang isa ka lalaki nga nakagapos ang tiil kag kamot, nakahigot sa sako kag daw kaangay nga ginpilpilan sang bato agud nga indi maanod.
Wala ini sang pang-ibabaw nga panapton kag nakashorts nga itom.
Samtang padayon sagihapon ang pagpanawagan sa mga nadulaan sang himata, sarang lamang nga makapakig-angot sa Bacolod Police Station 2.
