Natumod na ang nasapwan nga bangkay sang lalaki nga nakita sa sulod sang isa ka pribado nga salakyan sa Barangay Efigenio Lizares, Talisay City, Negros Occidental sang Disyembre 2, 2025 sang gab-i.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, personal nga gintumod sang magulang sang biktima ang bangkay matapos nga nagpadulong ini sa nasambit nga police station halin sa Victorias City.
Suno kay Jocson, natumod sang pamilya ang biktima bangud sa panapton nga ginasuksok sini sang ini ang nadula sang Domingo.
Ginproseso naman sang operatiba sang Scene of the Crime Operation (SOCO) ang bangkay para sa autopsy nga request man sang pamilya agud nga matumod ang gintunaan sang kamatayon sang ila himata.
Hungod nga wala na ginhingadlan ang biktima santo man sa request sang pamilya.
Nagpasalamat ang Talisay City Police Station sa tanan nga nagbulig sa pagpalapta sang impormasyon agud nga mapalab-ot sa himata kag matumod man ini.
