Nakilal-an na ang bangkay nga nasapwan sang mangingisda sa baybayon sang Talisay City kag gindala sa Barangay 2, Bacolod City, kahapon sang aga.
Sa interview sang Bombo Radyo kay Police Major Eugene Tolentino, station commander sang Bacolod Police Station 2, ang biktima ang ginkilala nga si Minda Flores, 78 anyos residente sang Brgy Vista Alegre, Bacolod City.
Suno diri, si Flores ang ginkilala mismo sang iya mga hinablos.
Nahibaluan nga masami nga nagalakat ang biktima kag ini ang nagapauli kun kaisa sa iya man mga himata sa Brgy Handumanan apang sang Setyembre 23 naglakat ini kag wala nakapauli.
Kahapon nakita sang mananagat nga si Sammy Linugon, residente sa Brgy 2, Bacolod City, ang bangkay ni Flores nga naga-utaw utaw sa bahin sang ciudad sang Talisay.
Gilayon nga ginhigot ni Linugon sang pisi ang bangkay, kag gindala na lamang sa Brgy 2, Bacolod City sa iya nga pagpauli.
