Gindala na sa iya dutang-natawhan si anay Negros Occidental Governor Alfredo Marañon Jr.
Alas-2:00 kaina sang hapon, nagpatigayon sang malip-ot nga seremonya sa Negros Occidental Provincial Capitol sa pagtaliwan sang anay gobernador antes ini gindiretso sa ciudad sang Sagay.
Madumduman nga ini ang ika-41 nga gobernador sang probinsya kag nagserbe sumugod 2010 tubtob 2019.
Nagtaliwan ini sa edad nga 84 anyos sa Riverside Medical Center takna alas-11:38 kagab-i.
Pagkatapos sang malip-ot nga stop-over sa Kapitolyo, gilayon ini nga gindala sa Sagay agud didto ihaya.
Nakatalana naman nga ilubong si Marañon sa Domingo, takna alas-2:00 sang hapon.
Sa interview sang Bombo Radyo Bacolod kay Governor Eugenio Jose “Bong” Lacson, tuman ang pagpasalamat sini sa pamilya Marañon ilabi na kay Dr. Marilyn, nga asawa sang nagtaliwan nga anay opisyal, bangud nga wala niya ini gindumot sa probinsya.
Gindumdom man ni Lacson ang lima ka dekada nga pagserbe ni Marañon.
Ginapasalamatan man sini ang anay gobernador bangud sa oras nga ginhatag sa Negros Occidental kasubong man sa iya nga dedikasyon.
Ginabatyag man sini ang kakulang karon nga nagtaliwan na si Marañon nga nakaupod man sini sang anum ka tuig.
Madumduman pa sini nga apisar nagalain ang pamatyag, nagasulod pa sa opisina si Marañon para magdihon sang mga proyekto, nga nagapakita lang kun ano sini ka palangga ang probinsya.
Madamo naman ini sang nahimo nga programa nga ginalakipan sang nahanungod sa health, education, infrastructure, agriculture, fisheries kasubong man sa pagsuporta sa BPO companies kag kooperatiba.
Samtang ginpakigbahin naman ni Dr. Marilyn Marañon, asawa ni anay Gov. Alfredo Marañon Jr., nga nagtukod man sang tatlo ka mga simbahan sa ciudad sang Sagay ang nagtaliwan sini nga bana subong nga may ginapangatubang nga COVID-19 pandemic.
Nagdonar man ini sang duha ka ektarya sang duta para sa amo nga programa.
Samtang, ginpahayag man sang Marañon matriarch nga antes magtaliwan ang anay gobernador, nagbilin man ini sa ila mga kabataan nga indi gid mag-inaway tungod sa kwarta.
