Napauli na sa Capiz ang bangkay ni Corporal Renold Gardose nga napatay sa engkwentro batok sa gina-alegar miyembro sang New People’s Army sa boundary sang Brgy Sto. Ninio, Tanjay City kag Brgy Narra, Bayawan City, Negros Oriental sang Dominggo sang aga.
Sa interview sang Bombo Radyo kay Brig. Gen. Jason Jumawan, commander sang 302nd Infantry Birgade, nakabyahe na kagab-i ang pamilya ni Gardose pabalik sa Capiz dala ang bangkay sang napatay nga suldado.
Suno diri, ang nasamaran naman nga isa ka Private First Class ang nakabalik na sa iya unit kag hilway na nga maka-operate sa liwat.
Suno kay Jumawan, ang mga rebelde naggikan sa banwa sang llog kag ciudad sang Kabankalan, Negros Occidental kag nagbyahe padulong sa Negros Oriental.
Madamo sang mga pumuluyo ang nagreklamo bangod indi sila makapahuway sang insakto kun ginapatawag sila sang rebelde nga grupo kun gab-i para sa meeting kag ginakuha pa ang ila mga pagkaon.
Nagpatigayon sang military operation ang Philippne Army nga nagresulta sa pagkapatay ni Gardose apang nagapati man ini nga may pilason man sa bahin sang makawala nga grupo base sa mga dugo nga nakit-an sa area.
