Nasapwan na ang bangkay sang 12 anyos nga dalagita nga nalumos sa Matab-ang River sa Purok Santol, Barangay Zone 15, Talisay City kahapon sang hapon.
Ang bangkay ni Mae Ann Suplemento, residente sang Purok Mahimayaon, Barangay Bata ciudad sang Bacolod, ang nakit-an sang mga pumuluyo sang Barangay Banago nga nagpaligo sa suba sa Hacienda Sta. Maria Uno, Barangay Zone 15, Talisay City, alas-11:00 kaina sang udto.
Suno sa mga pumuluyo, ginabanta isa ka kilometro ang distansya sang ginlumsan sang biktima kag lugar sa diin ini nakit-an.
Nag-alsa ang tiil sang dalagita gani nakit-an ini sang pila ka mga lalaki nga taga-Banago.
Suno kay Analyn Gonzales, residente sa lugar, may bagras si Suplemento sa iya nga tuhod nga mahimo tuga sang pagsangit sini sa mga kahoy.
Gilayon man nga nagpadulong sa lugar ang pamilya sang dalagita.
Kahapon, tatlo ang naglugdang sa tubig apang nakaluwas ang duha samtang namissing naman si Suplemento.
