Nasapwan kahapon ang bangkay sang duha ka estudyante nga nalumos sa suba sa Brgy. Malubon, Sagay City sang Biyernes.
Sa interview sang Bombo Radyo Bacolod kay Lt Junior Grade Richelito Arbis, assistant station commander sang Coast Guard Station Northern Negros Occidental, nagpaligo sa suba sa Prk Jordan, Brgy Fabrica, Sagay City ang 10 ka mga estudyante bangod kaadlawan sang isa nila nga kaupod.
Apang bangod nag-ulan sa bukid, hinali nga nagbaskog ang daludo sang tubig sa suba gani naanod ang 15 kag 16 anyos nga lalaki.
Nakaangkon naman sang kabudlayan ang pagpangita bangod sa malubog nga tubig sa suba.
Nasapwan kag narecover sang Bantay Suba ang bangkay sang isa sa pangpang sang suba alas-10:16 kahapon sang aga sa bahin sang Brgy Paraiso, samtang ang isa ang nasapwan naman sa Brgy Himogaan Baybay, alas 10:20 sang gab-i sa kaangay nga ciudad.
