Nasapwan ang isa ka bangkay sang lalaki sa Twin River, Purok Katilingban, Barangay San Miguel, banwa sang Murcia kahapon sang aga Enero 16.
Ginkilala ang biktima kay Ryan Nacion, 25, residente sang Purok Kabugwason, Barangay Mansilingan, ciudad sang Bacolod.
Sa interview sang Bombo Radyo Bacolod kay Police Major Rhojn Darell Nigos, spokesperson sang Negros Occidental Police Provincial Office, nakabaton sang tawag ang Murcia Municipal Police Station nga may yara sang naglutaw-lutaw nga lawas sang tawo sa suba.
Suno kay Nigos, sa imbestigasyon nga ginpatigayon sang mga kapulisan, sang Enero 14 sang hapon, ang biktima kag ang abyan sini ang nagpadulong sa Calibago river agud nga magpaligo apang nakadalin-as ang biktima kag gin-anod sang mabaskog nga current sang tubig ang biktima kag nasapwan sa suba sa banwa sang Murcia kahapon.
Ginahulat na lamang sang mga kapulisan ang resulta sang post mortem examination sa bangkay sang biktima agud mahibaluan kun pwersa ukon ang rason sang kamatayon sini.
