Nakit-an na ang bangkay sang 32-anyos nga lalaki nga nagasuprer sang epilepsy kag nalumos kahapon sa Purok Roma, Brgy. Singcang Airport, Bacolod City.
Ginkilala ang biktima kay Teddy Paclipan Jr., 32 anyos nga lalaki, pumuluyo sang amo nga lugar.
Sa inisyal nga imbestigasyon, ang biktima ang nagpanikop sang isda apang sang ulihi, wala na ini nakita.
Madumduman nga sa pahayag ni Yolinda Paclipan, iloy sang biktima, nag-untat na sa pag-inom sang bulong sa balatian sini nga epilepsy ang biktima.
Nagbiya sa ila puluy-an si Taddy pasado alas-10:00 sang aga agud magpanikop sang tilapia kag alimango.
Natingala na lamang ang iloy sini nga wala nakapauli ang biktima.
Sa interview sang Bombo Radyo kay Anecito Paclipan, tiyo sang biktima, kahapon, nagpangayo ini sang bulig sa mga rescuers apang siya ang ginhambalan nga dapat magpablotter anay kag maghulat sang 24 oras.
Alas 4:00 sang hapon, nag-abot ang mga ini kag nagtindog lamang sa pika-pika.
Pagka-alas 7:00 sang gab-i, suno kay Paclipan, naglusong ang mga ini sa tubig.
Nagpalapit ini sa mga rescuers agud maggiya kuntani apang siya ang ginpahalin kag ila ginkordon ang lugar.
Suno diri, indi maglapaw sa duha ka oras nga nagsalom ang diver apang suno sa ila, naurutan na ini sang hangin.
Nagbiya ang mga rescuers sa lugar kag ginpahayag nga sila ang magabalik pagka-alas 8:00 subong nga aga.
Suno kay Paclipan, nagpabilin ini sa lugar bilog nga gab-i bangud siya ang nagakabalaka sa iya nga hinablos.
Pasado alas 7:00 kaina sang aga, amat-amat nga nagnubo ang tubig kag nagdesisyon ang mga ini nga ariyahan sang lambat.
Sa ila ikaduha nga ariya, nakit-an ang bangkay sang iya hinablos sa likod sang salakyan, tatlo ka metros ang kalayuon sa pika-pika.
Ang bangkay ang nasapwan nga naga-untay na kag nagakulo ang kamot sa pamwersa.
Nagapati ini nga posible gin-atake sang epilepsy ang iya hinablos bangud sagad man ini maglangoy.
Suno diri, nagalain ang iya buot sa mga rescuers bangud wala siya ginpamatian nga sidsirun ang tambi-tambi kag sila ang nagpicture-picture lang.
Apisar nga nagalain ang buot sang ila pamilya sa mga rescuers, nagapasalamat ini sa gihapon nga sila ang nagresponde sang nangayo ang mga ini sang bulig.
Samtang, ginpahayag ni Punong Barangay Rosinie Distrito nga nagpatigayon sang search and rescue operations ang katapo sang Philippine Coast Guard kag Disaster Risk Reduction and Management Office.
Suno kay Distrito, si Teddy ang nadula sa Purok Roma apang nakit-an sa Purok Cadena, nga magkaingod lamang nga purok.
Suno diri, nagtinguha gid ang mga rescuers nga maubra ang ila mga responsibilidad.
Wala naman nagalain ang buot sang mga rescuers sa pamilya sang biktima kag ila naintindihan nga nagaagi ang mga ini sa karun sa tuman nga kasakit gani sila ang nagapangita sang mabasol ukon mapautwasan.
Suno kay Distrito, nagapakig-unong ang barangay sa kalisod sang pamilya Paclipan.
