Isa ka bangkay sang 50 anyos nga lalaki ang nasapwan sa iya mismo nga puluy-an sa Don Salvador 1, Barangay Tinampaan, Cadiz City, Negros Occidental kahapon.
Suno kay P/Lt. Lester Oliveros, Deputy Chief of Police sa Cadiz City Police Station, nga nagtawag sa ila ang pinuno sang tanod sa Barangay Tinampaan agud nga ipahibalo ang natuhoy sa nasapwan nga bangkay.
Ang biktima nga ginkilala kay Johny Cayas, residente sa lugar kag wala sang asawa.
Nahibaluan nga ang biktima lang kag ang utod sini nga wala man sang asawa ang upod sa puluy-an.
Apang yara naman sa lawod kag nagapanagat ang utod sini sang nadulaan sang kabuhi ang biktima.
Nahibaluan nga madamo sang ginabatyag nga balatian ang biktima kag haluson indi na makatindog.
Ginadul-ongan lang ini sang makaon sang mga hinablos bangod nagaisahanun lang ini sa puluy-an.
Suno kay Oliveros, gindala pa ang biktima sang tinalikdan nga semana sa ospital agud ipacheck-up.
Rekomendasyon naman sang doktor nga i-admit kuntani ang pasyente, apang ginalantaw nga bangod sa wala sang magabantay sa ospital kag kakulang sang budget, ginpauli nalang ini sa iya puluy-an.
Pahayag ni Oliveros nga santo sa ila imbestigasyon, natural cause ang nangin kamatayon sang biktima bangod wala man sang indikasyon sang pagpwersa sa lugar ukon indikasyon sang pagpangawat.
Wala naman matumod kun ano ang balatian ni Cayas, apang santo sa mga hinablos sini nga madamo na sang ginabatyag sa lawas ang biktima kag indi na madala ang lawas sa paglakat.
Dugang pa ni Oliveros nga natukiban man sang mga ini nga gintinguhaan pa kuntani nga makatindog sang biktima sang Biyernes, apang natumba ini kag nalampos ang ulo.
Madamo man ini sang kaingod balay nga nagapahayag man nga natural nga kabangdanan ang kinamatay sang biktima.
