Ginalauman nga madala na subong nga adlaw sa ila nga balay ang bangkay sang isa sa biktima sang pagpanglampos sang bato sa Hda. Badiang, E. lopez, Silay City.
Sa interview sang Bombo Radyo Bacolod sa amay sang tatlo ka biktima nga si Edmund Bornales, ginapaabot karon ang iya isa ka bata nga napatay agud ihaya sa ila nga balay.
Samtang ginpakigbahin man niya ang kahimtangan sang duha pa niya ka bata nga yara pa sa karon ginabulong sa opistal kun sa diin ang 15-anyos nga bata ang napaidalom na sa operasyon samtang ang apat ka tuig nga bata ang ma-estorya na.
Suno kay Bornales, wala na sang problema para sa lungon kag pantyon apang nagapanawagan ini sa dugang nga donasyon para sa pagkaon para sa lubong.
Ginapalab-ot man ni Bornales ang iya pagpasalamat sa tanan nga nagbulig sa ila nga pamilya ilabi na sa mga Local Government Units sa nagkalain-lain nga ciudad, sa Provincial Government, kag sa mga private sectors.
Samtang padayon naman ang imbestigasyon sang kapulisan tuhoy sa responsable sa krimen.
