Apat na ang naretrieve gikan sa siyam ka mga namissing nga crew sang naglugdang nga FV St. Peter The Fisherman II.
Madumduman nga naglugdang ang barko sang Biyernes sang kaagahon sa tunga sang Sicogon Island sa Carles, Iloilo kag Cadiz City, Negros Occidental kun sa diin una naman nga narescue ang 22 ka mga tripulante kag siyam ang reported nga missing.
Sa pagpatigayon sang search and retrieval operation sang Philippine Coast Guard duha ka bangkay ang una na nga nasapwan sang Sabado sang kagab-ihon.
Sa interview sang Bombo Radyo Bacolod kay Chief Petty Officer Wilmar Dolorfino, commander sang Coast Guard Sub Station Cadiz, ginpahayag sini nga ang naretrieve nga mga bangkay amo sanday Norberto Parlotzo, residente sa Bantayan Island, Cebu, ang Sonar Operator sang barko kag ang Piscador nga so Rommel Engle sang Cadiz City, Negros Occidental.
Magluwas sa duha nga una nga naretrieve kasunod naman nga nasapwan sang technical divers sang Philippine Coast Guard ang duha pa ka mga biktima kahapon sang hapon.
Sa ulihi nga impormasyon, wala pa sang identity ang duha ka bangkay.
Suno kay Capt. Ludovico Librilla, commander sang Coast Guard Station Negros Occidental, naglutaw ang bangkay sang isa ka biktima samtang ang isa ang nasapwan naman sang isa ka technical diver.
Pasalig naman ni Librilla nga mahingadlan ang mga ini sa Cadiz City Port bangod yara diri ang personnel sang shipping company nga amo ang magakilala sa mga bangkay.
Subong nga adlaw, natalana naman nga magsalom ang mga technical divers para sa search and retrieval operation kag tinguhaan sang mga ini nga masulod ang barko agud nga makita ang lima pa ka nabilin nga missing.
