Wala pa naidentify ang babayi nga nasapwan nga wala na sang kabuhi sa Bays Center sa dalan San Juan ukon sa tupad sang Bacolod City Police Office Station 1.
Suno kay P/Maj. Jovil Sedel, station commander sang Police Station 1, ang mga taga Bacolod City Disaster Risk Reduction Management Office ang nagpahibalo sa mga kapulisan nahanungod sa nasapwan nga bangkay sang babayi.
Nahibaluan nga gincheck sang Bacolod CDRRMO sang Biyernes ang babayi kag natukiban nga wala na sang kabuhi kahapon.
Ang biktima ang may deperensya sa paminsarun kag ginabanta nga yara sa masobra 30 anyos.
Masami nga makita ang biktima sa plaza nga nagasaot kag nagatulog sa ibabaw nga bahin sang Bays Center sa San Juan Street.
Suno sa hepe, wala pa sang himata nga nagpadulong sa estasyon rason kun nga wala pa mahibaluan ang identity sini.
Ginalantaw naman nga natural death ang kabangdanan sang kamatayon sang biktima bangod sa wala sang makita nga pilas sa lawas sini.
Ang bangkay ang gilayon nga ginkuha sang Department of Social Services and Development (DSSD) kag gindala sa ABE Funeral Homes.
