Nasapwan ang bangkay sang isa ka driver sang traktura nga yara na sa advance state of decomposition sa kampo sa Purok Matinumanon, Barangay Alianza, Bago City kaina sang kaagahon, nga gina-alegar ginlabo.
Ang biktima ang nakilala nga si Boddy Custodio, 42 anyos, residente sa Purok Kalubihan, Barangay Bacong, Bago City.
Samtang ang mga suspetsado ang ginkilala lamang kanday alias Jundi kag alias Lolen, lunsay mga residente sa Barangay Santol, Isabela, Negros Occidental nga nagatrabaho bilang kargador sang tubo sa nasambit nga lugar.
Suno kay P/Maj Ronald Santillan, hepe sa Bago City Police Station, santo sa ila imbestigasyon nahibaluan nga sadtong Desyembre 14 pa sang ginlabo ang biktima.
Pahayag sang bata nga lalaki sang biktima nga si John Michael, nga nag-umpisa ang komosyon sa tunga nila kag sang mga suspetsado sang ginbastos sang mga suspetsado ang iya asawa.
Ginapahayag nga ginalingling sang duha ang asawa ni John Michael samtang yara sa CR kag ginayamuhat pa nga sila ang magahugas diri.
Ang nasambit nga insidente ang nahisayran naman santo sa bata sang biktima matapos ang pagsugilanon.
Apang sang Desyembre 14, sang ila malabayan ang duha ka suspetsado nga lunsay hubog, ginpinsar sang mga ini nga sila ang ginaplanuhan sang mag-amay gani ila ang mga ini ginlagas dala ang binangon sa tinutuyo nga unahan.
Paathag sang bata nga wala sila sang tinutuyo nga magbalos sa duha apang sila ang hinali na lamang nga ginlagas.
Nagbulagay sila sang iya amay kag siya ang gilayon nga nagpadulong sa ila ugangan kag didto na nagpaligad sang gab-i.
Nagpinsar man ini nga nakapalagyo kag nakapanago ang amay bangod malayo naman ini sang iya ulihi nga nakita.
Apang ang bangkay sang amay ang nasapwan na lamang kaina sang aga nga nalubong sa isa ka gin-arado na nga kampo kag ini ang natampukan sang duta.
Sa karun ginahulat pa ang imbestigasyon sang Scene of the Crime Operation (SOCO) sa kun pila ang naagom nga labo sang biktima.
Padayun paman nga ginatumod ang matuod nga identity sang duha ka mga suspetsado.
