BACOLOD CITY – Nakilal-an na ang bangkay sang lalaki nga nasapwan nga nagapos ang kamot kag tiil kag ginhaboy sa higad sang katubuhan sa Hacienda Luisa, Barangay Granada, kaina sang kaagahon.
Suno kay Police Chief Insp. Sherlock Gabana, hepe sang Police Station 5, ang biktima ang nagahingalan kay Rodney Mavilla, 26-anyos, soltero kag pumuluyo sang Purok Sigay, Barangay 2, ciudad sang Bacolod.
Ang biktima ang ginkilala sang iya amay nga personal nagpadulong sa lugar kun sa diin ini nasapwan.
Sa pagpangusisa sang kapulisan, may nakit-an nga isa ka bala kag isa ka basiyo sang bala sang wala pa matumod nga kalibre sang armas malapit sa bangkay.
Samtang, nagapati naman ang hepe nga sa iban nga lugar ginpatay ang biktima kag ginhaboy lang sa lugar sa diin malaka ang mga pamalay.
Samtang kumpirmado nga ini si alias Tabby nga katapo sang notoryos nga Aki Cuadra Group nga imbolbado sa ilegal nga druga, pagpanghold-up kag pagpang-carnap.
Nahibaluan nga base sa nasulat sa plackard sa lawas sang biktima, nabutang ang mga tinaga nga, “Ako si Tabby, myembro sang Aki Cuadra Group, pusher, hold-up kag carnapper nga nagaigo sa ciudad sang Bacolod kag sa malapit nga mga ciudad. Indi niyo ko pagsunda”.
Suno kay Chief Insp. Gabana, ila ginalantaw ang anggulo nga ginlikidar sang karibal nga grupo si Mavilla apang bukas man sila sa posibilidad nga ang lansihanay sa baligyaanay sang druga, pagpanghold-up kag pagpang-carnap ang motibo sa krimen.
