Wala pa gihapon makilal-an ang bangkay sang lalaki nga nasapwan nga naga-utaw utaw sa baybayon sang Purok Bayanihan, Barangay Banago, Bacolod City kaina alas-7:20 sang aga.
Sa interview sang Bombo Radyo Bacolod kay Punong Barangay Arnel ‘Baldo’ Benjamin, ang bangkay nga nagakulob ang nakit-an sang isa ka manughipon gani ini ang nagtawag man sang bulig agud nga mapahigad ang lawas.
Ginabanta yara sa edad nga 50 anyos ang lalaki samtang dako man ang posibilidad nga ini ang nalumos bangod wala ini sang pilas sa lawas, apang nagadugo ang ilong sini.
Indi paman bloated ang bangkay gani mahimo nga wala pa 24 oras sang nalunod ang biktima sang ini ang nasapwan.
Apang paga-imbestigaran pa sang Scene of the Crime Operation ang bangkay agud matumod ang gintunaan sang kamatayon sini.
Suno kay Benjamin, ang biktima ang mahimo indi residente sa Barangay Banago bangod wala sang may nakakilala diri.
Samtang ginalantaw man sang Punong Barangay nga malayo nga mangingisda ang biktima bangod ini ang maputi kag kaangay nga wala nabulad sa initan.
Nakig-angot man ini sa Bacolod Police Station 3 apang wala man sang may nakareport sa estasyon nga may namissing nga himata.
Panawagan ni Benjamin sa mga may himata nga wala pa nakapauli nga makig-angot lamang sa Barangay Hall sang Barangay Banago ukon sa Bacolod Police Station 3 agud sila ang ma-assess sa pagtumod sa identity sang bangkay.
Samtang ginalantaw naman sang hepe sa Bacolod Police Station 3 nga mahimo may balatian, hubog, ukon natulugan ang biktima gani ini ang nalunod.
Sa interview sang Bombo Radyo Bacolod kay Police Major Armilyn Vargas, hepe sa Bacolod Police Station 3, mahimo nga samtang yara sa iya sakayan ang biktima ini ang naka-inom sang makahulubog nga ilimnon, may ginasuprer nga balatian kag nadulaan sang animo, ukon nakatulog nga nagresulta sa pagkahulog sa dagat apang mahimo man nga ini ang ginbiring sang yara na sa dagat.
Ini bangod wala sang pilas sa lawas sang biktima kag nagadugo lamang ang ilong.
Wala naman sila sang nakita nga mga lagob sa lawas ukon inagyan sang gapos sa biktima, gani wala sila sang nakita nga foul play.
Ginkuhaan na sang litrato ni Vargas ang biktima agud nga sila ang may maipakita sa mga maga-inqure nga residente.
Panawagan sang hepe sa mga may naglesinsya nga himata nga magapalawod apang tubtob karun wala pa makapauli nga magpadulong sa ila agud makabulig sa imbetigasyon.
