Wala pa maclaim sang pamilya ang isa sa mga rebelde nga napatay sa engkwentro sa tunga sang militar kag New Peoples Army sa Hacienda Paraiso, Brgy Caduha-an, Cadiz City sang Domingo, Marso 9 sang kaagahon.
Ang napatay ang ginkilala kanday Hans Ponteras Alyas JOJO/LANCE/TEDDY/MOJO kag nagapungko nga Regional Front Secretary kag Finance Officer kag pinuno sang Regional Taxation Implementing Group sang Komiteng Rehiyon-Negros,Cebu,Bohol,Siquijor (KR-NCBS) kag Marisa Pobresa alyas KIM/RENZ/MIA kag Regional Communication Officer, sang nasambit nga grupo.
Sa interview sang Bombo Radyo Bacolod kay 1st Lt. Dan Carlo Samoza, Civil Military Officer sang 79th Infantry Battalion sang Philippine Army, ang bangkay ni alyas Kim, 23 anyos kag residente sang Kabankalan City ang nakuha na sang iloy sini agud nga madala sa ila balay agud nga mahaya kag mahatagan sang decente nga paglubong.
Samtang suno kay Samoza ang bangkay naman ni alyas Jojo ang nagapabilin sa punerarya kun sa diin ginapangita kun taga diin gid ini bangud wala mahibaluan kun sa diin gid ang address sini.
Nahibaluan nga nagdangat sa pito ang naka-engkwentro sang Philippine Army kun sa diin naglawig sang pito tubtob walo ka minutos ang pagbayluhanay sang lupok.
Ginalantaw man nga ang naka-engkwentro ang mga remnants sang dismantled Northern Negros Front nga naka-engkwentro man sang militar sang Pebrero.
Padayon nga ginaengganyo sang Philippine Army ang mga nabilin nga katapo sang NPA nga magsungka na kag magbalik sa sabak sang gobyerno agud nga makabenepisyo sa reintegration kag amnesty programs.
