Isa ka bangkay sang lalaki ang nasapwan sa higad sang dalan sa Hacienda Othelia, Barangay Efigenio Lizares, Talisay City kaina sang kaagahon kag sa karon, wala gihapon ini sang identity.
Suno kay Bart, nakabati ini sang duha ka sunod-sunod nga lupok ala-1:00 sang kaagahon kag nakit-an sini ang pick up nga puti nga nagikan sa lugar kag padulong sa ciudad sang Silay, apang indi sini matumod kun amo ini ang ginsakyan sang biktima.
Wala man ini nakahibalo nga may gintiro sa lugar bangud wala man niya nakita.
Gindumdom ni Bart nga sa namatyan sa unhan ang lupok bangud senigundos man ang antad sini.
Suno kay Police Major Wilfredo Benoman, deputy chief sang Talisay City Police Station, isa ka nagaubra sa kampo sang tubo ang nakakita sa lalaki alas-5:50 sang kaagahon.
May duha tubtub tatlo ka pilas ang biktima sa nawala nga bahin sang ulo apang indi pa matumod kun ano ang nagtuga sini tubtub matapos ang forensic examination.
Ginabanta nga nagaedad ini sang 60 anyos pasaka, ubanon na, 5’2” ang height, nagasuksok sang jacket kag itom nga dilargo, nauba na ang iya sapatos, samtang wala man sang nakita nga wallet ukon IDs sa iya nga bulsa.
Suno kay Benoman, mahimo nga caliber .45 pistol ang armas nga gingamit kun matunog ang lupok apang magadepende pa ini sa content sang pulbura bangud wala man sang empty shells nga narecover sa crime scene.
Ang area ang kampo na sang tubo kag ginapatrolyahan man sang ila nga mobile patrol kun kaagahon bangud malapit na ini sa Bacolod Silay Airport Access Road.
Ginalantaw naman nga pangayaw sa lugar ang biktima bangud wala sang pumuluyo nga nakakilala sa iya sa lugar.
Indi pa man mahambal kun sa lugar ini ginpatay paagi sa pagtiro ukon pagbuno bangud may hematoma man ini sa ulo.
Wala pa man sang pamilya nga nagpalapit sa lugar agud magpahibalo sa mga pulis nga may himata sila nga wala nakapauli.
