Nagapabilin nga wala sang identity ang bangkay sang isa ka lalaki nga nasapwan sa Locerne St, Helvetia Heights, Barangay Villamonte, Bacolod City, kahapon.
Sa interview sang Bombo Radyo Bacolod kay Police Major Marc Joel Reclamado, station commander sang Bacolod City Police Station 4, may nasapwan nga isa ka lalaki kag ginalantaw nga napatay sang Martes pa sang gab-i.
Suno kay Reclamado, ang rason sang kamatayon sang biktima ang wala pa mahibaluan bangud ginaproseso pa sang Scene of the Crime Operation (SOCO) Team.
Suno diri, gindala na sa punerarya ang biktima agud nga matinluan santo man sa request sang SOCO.
Suno sa station commander may yara ini sang mga pilas gikan sa matalum nga bagay.
Ang bangkay ang nasapwan sang isa ka scrapper.
Wala man sang pamilya ang nagkadto sa Abe funeral parlor agud magclaim nga ini ang ila nga himata.
Ang nasapwan nga wala na sang kabuhi nga lalaki ang nagasuksok sang itom nga short kag luab nga duag green.
Naglibot naman ang investigator on case sa lugar agud nga magpamangkot kun may nakakilala sa bangkay apang negatibo ang resulta.
Nagpanawagan man si Reclamado sa publiko nga may nadula nga himata nga makig-angot lamang sa Bacolod Police Station 4.
Sa karun padayon ang imbestigasyon sang mga otoridad agud nga matumod ang identity sang nasapwan nga bangkay.
