Wala pa sang identity ang bangkay nga nasapwan sa katubuhan sa Purok Reles, Barangay Salvacion, Murcia alas 6:25 sang gab-i, Disyembre 26.
Suno kay Police Major Sherwin Fernandez, hepe sang Murcia Municipal Police Station, nakasimhot sang indi maayo nga baho si Francisco Rada, 54-anyos, samtang nagapaharab sang karbaw kag nakit-an sini ang isa ka persona nga nagahamyangon sa duta kag ginatabunan sang dahon sang tubo.
Nagasuksok ang nasambit nga persona sang itom nga t-shirt, green nga shorts kag itom nga tsenilas.
May yara ini spiral tattoo sa iya natuo nga abaga, medium ang panglawason, brown complexion kag ginabanta naga-edad 30 tubtob 35-anyos.
May pilas ini sa guya kag yara na sa stage of decomposition.
Sa karun nagapadayon pa ang imbestigasyon sang kapulisan.
