Patay na sang nasapwan ang isa ka lalaki nga nagalutaw sa Sicaba River sa Hacienda Bernardita Barangay Caduha-an, ciudad sang Cadiz, Negros Occidental.
Sa interview sang Bombo Radyo Bacolod kay Police Chief Master Sergeant Ivonne Berja, Chief Inverstigator sang Cadiz City Police Station, may nagparecord nga asawa nga missing person ang bana sini humalin pa sang December 22 mga alas 10:00 tubtob alas 11:00 ang takna sang gab-i.
Suno kay Berja, kahapon may nasapwan nga bangkay sang lalaki nga naga-utaw utaw sa Sicaba River.
Ang bangkay ang nakita sang mga nagapamunit sa suba kun sa diin nagpangayo man sang bulig sa iban nga mga residente agud mapahigad ang bangkay.
Suno sa imbestigador may duda ang pamilya nga may foul play sa kamatayon sang biktima apang wala man ini sang kumpirmasyon.
Gin-interview man sang imbestigador si Alyas Michael ang upod sang biktima antes pa man ini nasapwan kahapon kag nagpaupod kun sa diin sila ulihi nga nag-updanay.
Didto nakita sang mga kapulisan nga didto ang mga ini nagpadulong sa bahin sang Barangay Purisima sa relocation site.
Suno sa pahayag ni alyas Michael, antes sila nagbulagay sang biktima may yara sang nagflashlight sa ila nga ginalantaw katapo sang DRRMO nga nagamonitor sa level sang tubig sang suba bangud nga nagainulan.
Suno diri sa wala mahibaluan nga rason nagdinalagan ang mga ini sang matuonan sila sang siga sang flashlight kag ang biktima ang nagpalagyo padulong sa suba.
Ginalantaw nga mahimo nakadanlog ini kag nagkadto sa suba kag nalunod bangud sa mabaskog nga current sadtong tinion.
Sa karun padayon pa ang imbestigasyon sang Cadiz City Police Station agud mahibaluan ang gintunaan sang pagkalunod sang biktima kag kun may yara sang foul play.
