Ginapatihan nga nakuryente ang 32 anyos nga lalaki nga nasapwan nga wala na sang kabuhi sulod sang iya balay sa Purok Maninihon, Barangay Pahanocoy, Bacolod City.
Madumduman nga ang biktima ang ginkilala kay Ranel Era kag nagatrabaho sa kompaniya sang printer sa ciudad sang Bacolod.
Suno kay P/Maj Joery Puerto, station commander sang Bacolod Police Station 8, nagapanimaho na ang balay apang wala sang nagasabat gikan sa sulod.
Bangod sa nakalock gikan sa sulod ang balay, ginpaagi sang mga ini ang isa ka bata sa bintana nga ginpalusan sang agud nga mabuksan ang piyertahan.
Ila nga nasapwan ang bangkay sang biktima nga sunog ang nawong nga ginapatihan tuga sa pagkakuryente sini.
Sa imbestigasyon sang kapulisan, yara sa tupad sang biktima ang iya nga nasunog nga charger nga mahimo nagshort circuit kag naglupok samtang gina-uyatan naman ini ni Era gani siya ang nakuryente.
Mahimo man nga natumba ini kag nakabunggo ang ulo tubtob sa napatay ilabi na nga naga-isahanon lang ini sa balay.
Ginalantaw man nga mahimo tatlo na ka adlaw nga napatay ang biktima bangod sang Sabado pa ini sang ulihi nga makita sang mga kaingod.
Si Era ang naga-isahanon lang sa iya puluy-an bangod bulag ini sa iya nga asawa.
Ang siyam ka tuig nga bata sini ang masami man nga nagabisita diri, apang ini ang yara sa luyo sang iya iloy.
Suno kay Puerto, magarequest pa ang mga ini sang autopsy examination sa bangkay agud nga maseguro kun ano ang matuod nga kabangdanan sa kamatayon sang biktima.
