Wala pa sang identity ang isa ka lalaki nga nasapwan patay sa Barangay Pasil, EB Magalona, Negros Occidental sang Biyernes sang aga Hulyo 11.
Sa interview sang Bombo Radyo Bacolod kay Police Major Eric Doronilla, Chief of Police sang EB Magalona Municipal Police Station, may nagpahibalo sa ila nga may nagapanimaho na sa nasambit nga lugar nga yara sa higad sang suba.
Suno kay Doronilla ang ginhimo sang opisyales sang Barangay ginpakadtuan nila sang Barangay Tanod ang lugar kag didto nakita ang bangkay kag malayo pa lang mapanimahuan na.
Nagpatigayon ang mga ini sang pag-interview sa tatlo ka mga tawo kag ang isa ang nagpahayag nga nakita sini ang tawo nga nagtabok sa suba kag naglabay sa sakayan nga nagpahayag pa nga masakay ini sa ceres samtang ang ikatatlo ang nagpahayag nga nakalabay pa ini sa ila kag ginpakaon kag gilayon man nga naglakat.
Suno sa hepe nga indi na makilal-an ang biktima kag indi man residente sang lugar ang biktima
Ginalantaw nga nagalinakat ang biktima kag ginutom kun sa diin mahimo nga nagcollapse kag nahulog sa suba kag nalumos nga gintunaan sang kamatayon.
Ginahulat pa sa karun ang autopsy result sa bangkay sang biktima agud matumod ang gintunaan sang kamatayon sini.
