Wala pa sang identity ang lalaki nga nasapwan nga wala na sang kabuhi sa Sitio. Lemoncito Brgy. Quintin Remo, Moises Padilla, Negros Occidental, kahapon sang hapon.
Sa interview sang Bombo Radyo kay Punong Barangay Felisa Villaflor, may isa ka tapasero nga nagsulod sa kampo sang nakita sini ang area nga ginatumpokan sang langaw kag may napanimahoan ini nga maisog nga baho.
Sa pagteksyar sang tapasero, didto na sini nakita ang bangkay sang lalaki nga nagahapa.
Ang bangkay may tattoo sa kamot, may suksok nga relo apang indi makita ang nawong sini bangod may tabon ang iya ulo.
Suno kay Villaflor, ang ulo sang bangkay may tabon nga bonnet kag gintabanon pa gid sang jacket.
May nakita man nga pilas sa kilid sang lawas sang biktima apang indi pa matumod kun may iban pa ini nga pilas sa lawas.
Wala man sang may nakakilala sa biktima sa area kun diin ini nasapwan.
Ginpahayag sang hepe sang Moises Padilla Municipal Police Station nga wala sang may nakapa-blotter sa ila angot sa namissing nga indibidwal.
Kahapon, may bangkay sang lalaki nga nasapwan nga nagahapa sa tunga sang kampo sa Sitio. Lemoncito Brgy. Quintin Remo, Moises Padilla, Negros Occidental.
Sa interview sang Bombo Radyo kay Police Major Romulo Gepilango, ang biktima nagasuksok sang puti nga tshirt, violet nga short, may tattoo, kag may silver nga relo.
Suno diri, ginabanta nga naga-edad ini sang 30 tubtob 40 anyos apang wala naman nakit-an ang nawong sang biktima bangod ini ang may tabon.
Wala pa man nadeterminar sa karun kun ano ang pilas sang biktima bangod may dugo ang bayo sini.
Sa karun nagapanawagan ini sa kun sin-o man ang may namissing nga himata nga magpakig-angot lang sa kapulisan.
