Nagapabilin nga wala sang identity ang isa ka lalaki nga nasapwan sa Suyac Island, Barangay Taba-ao, Sagay City, Negros Occidental sang Sabado sang aga, Pebrero 22.
Sa interview sang Bombo Radyo Bacolod kay Petty Officer 2nd Class Edwin Tapang, Deputy Sub Station Commander sang Coast Guard Sagay City, ang bangkay nga nasapwan ang may tattoo sa abaga nga imahen ni Hesu Kristo apang halos indi na ini makita bangud nga naga-amat amat na ini agnas ukon yara na sa advance stage of decomposition.
Suno kay Tapang, may yara man ini nga tattoo nga rosarito sa liog sini.
Suno kay Tapang, ginpahibalo lamang sila sang personnel sang Economic Office sang ciudad nga may yara sang nasapwan nga bangkay bangud man sa nagtawag sa ila nga boat operator.
Ginalantaw nga nalumos ini bangud wala man sang nakita ang mga otoridad nga may yara sang senyales sang foul play sa kamatayon sang nasapwan nga bangkay.
