Nalubong na sa Old Sagay Cemetery ang bangkay sang isa ka lalaki nga nasapwan sa Suyac Island, Barangay Taba-ao, Sagay City, Negros Occidental sang Sabado sang aga, Pebrero 22.
Sa interview sang Bombo Radyo Bacolod kay Police Lt. Col. Alvimar Flores, hepe sang Sagay City Police Station, bangud nagapanimaho na ang bangkay ginpalubong nalang ini.
Suno kay Flores, wala man sang nagpadulong sa nasambit nga police station agud nga magreport ukon magpangita sang mga nadula nga miyembro sang ila nga mga pamilya.
Suno sa hepe, nagpakig angot man sila sa kaiping nga mga isla apang wala pa sang nakareport nga may nadula nga persona.
Madumduman nga ang bangkay nga nasapwan ang may tattoo sa abaga nga imahen ni Hesu Kristo apang halos indi na ini makita bangud nga naga-amat amat na ini agnas ukon yara na sa advance stage of decomposition.
Ginalantaw nga nalumos ini bangud wala man sang nakita ang mga otoridad nga may yara sang senyales sang foul play sa kamatayon sang nasapwan nga bangkay.
Padayon man ang panawagan sang hepe sang Sagay City sa publiko nga kun may yara sang missing sa ila lugar mahimo nga makig-angot sa Sagay City Police Station bangud may nasapwan nga bangkay sa Suyac Island nga tubtob sa karun wala pa makilal-an.
