Nakilal-an na ang bangkay sang lalaki nga nasapwan nga natrap sa fishnet sa suba sa Sitio Maloloy-on, Brgy Punao, ciudad sang San Carlos, Negros Occidental.
Sa interview sang Bombo Radyo kay Police Lt. Col. Nazer Canja, hepe sang San Carlos City Police Station, napalubong na ang bangkay bangod ini ang yara na sa advance stage of decomposition sang masapwan.
Nagpadulong sa San Carlos City Police Station ang iloy sang biktima, nga nagapahayag nga may deperensya sa pamisaron ang iya bata.
Nadula ini sang Setyembre 20 samtang nasapwan naman sang Setyembre 22.
Dugang pa ni Canja nga naglisensya ang biktima sa iya iloy nga ini ang magapadulong sa iya abyan apang ini ang ginalantaw nga nagpaligo sa baybay kag nalumos.
May posibilidad nga wala sang may nakakita sa iya kag sang magsulod ang tubig bangod sa taob ini ang gin-anod padulong sa bahin sang punong.
Wala naman sang foul play nga nakit-an ang mga kapulisan kag nabaton naman sang iya pamilya ang natabo sa biktima.
