Yara na sa advanced state of decomposition sang nasapwan ang bangkay sang isa ka lalaki sa katubuhan sa Purok Maasin, Barangay Dulao, Bago City subong nga aga.
Ang lalaki, nga sa karun wala pa sang identity, ang nasapwan nga nagahapa, wala sang bayo pang-ibabaw, nakamaong nga itom kag wala sang tsinelas.
Suno kay Police Senior Master Sergeant Job Ogares, chief investigator sang Bago City Police Station, nagapanglakaton sa dalan si Roselyn sang nakapanimaho ini sang indi manami kag sang ila ginpalapitan ang hilamunan, didto nasapwan ang bangkay.
Alas 9:25 sang ginreport ini sa kapulisan nga gilayon naman nga ginrespondehan.
Suno kay Ogares, posible nga masobra apat ka adlaw na nga patay ang biktima bangud indi na manami ang baho sini, may mga langaw, ulod kag dugo na sa lawas.
Ginabanta naga-edad sang masobra 30-anyos ang biktima kag 5’4 ang kataason.
Sa ila pagpangusisa sa mga residente, sila ang may nabatian nga isa ka lupok sang Domingo.
Suno diri, ila pa ginakumpirmar kun may buho gid man sa lawas ang biktima kag kun ang iya mga pilas ang tuga sang luthang, buno ukon labo.
Suno sa iya, kun wala pa nakagwa ang autopsy result, indi pa nila makumpirmar ang mga injuries sini.
Nagapanawagan ang imbestigador sa mga may namissing nga himata nga makig-angot Bago City Police Station agud maverify kun ini ang bangkay nga nasapwan.
Sa karun nagapadayon pa ang imbestigasyon sang kapulisan.
